Bengaluru parking policy: కారు ఇంటి ముందు పార్క్ చేస్తే ఫీజు కట్టాల్సిందే.. ఏరియాను బట్టి అధిక మొత్తం – bengaluru gets new parking policy, roadside parking will expensive

0
18


సొంత కారుందా.. ఇంటి ముందే పార్క్ చేస్తున్నారా..? నగరాల్లో ఇదొక పెద్ద సమస్యగా మారింది. కార్లు, ఇతర వాహనాలు లెక్కకు మిక్కిలి పెరగడం, వాటిని రోడ్లపైనే పార్క్ చేస్తుండటంతో వాహనాలు, పాదచారుల కదలికలకు తీవ్ర ఇబ్బందులు ఏర్పడుతున్నాయి. ఈ నేపథ్యంలో బెంగళూరు నగర పాలిక సంస్థ కీలక చట్టానికి రూపకల్పన చేసింది. ఇకపై అక్కడ ఇంటి ముందు కార్లను పార్క్ చేయాలన్నా.. డబ్బులు చెల్లించాల్సిందే.

చిన్న కార్లకు రూ.1000, ఎస్‌యూవీల లాంటి కాస్త పెద్ద వాహనాలకు రూ.5 వేల వరకు చెల్లించాల్సి ఉంటుంది. అంతేకాకుండా ప్రాంతాలను బట్టి ఈ రేటు మారుతుంది. మూడు నెలలకు, ఆరు నెలలకు లేదా సంవత్సరానికి ఒకసారి పార్కింగ్‌ పర్మిట్‌ను కొనుగోలు చేయాలి. ఒక వాహనానికి ఒక పర్మిట్ మాత్రమే మంజూరు చేస్తారు. పర్మిట్‌లో అనుమతించిన స్థలంలోనే సంబంధిత వాహనాన్ని పార్కింగ్‌ చేయాలి. గడువు ముగిసిన తర్వాత పార్కింగ్‌ పర్మిట్‌ను రెన్యూవల్‌ చేసుకోవాలి.

కమర్షియల్ ప్రాంతాల్లో పార్కింగ్ ఫీజు 3 రెట్లు
ఇక షాపింగ్‌మాల్స్ లాంటి కమర్షియల్ ప్రాంతాల్లో గంట సమయం పాటు పార్కింగ్ చేస్తే విధించే ఫీజును 1.5 నుంచి 3 రెట్ల వరకు (ఏరియాను బట్టి) పెంచనున్నట్లు అధికారులు తెలిపారు. దీంతో పాటు ఇతర రహదారుల్లో వాహనాల పార్కింగ్‌ కోసం నెలవారీ పాసులను ప్రవేశపెట్టనున్నట్లు చెప్పారు. స్కూల్‌ బస్సులు, నిర్మాణ సంస్థల వాహనాలు, సిటీ సర్వీస్‌ బస్సులు, క్యాబ్‌ కార్లు, ఇతర రవాణా వాహనాలను నిలుపేందుకు ఆయా సంస్థల నుంచి బల్క్‌ పార్కింగ్‌ రుసుమును వసూలు చేస్తారు.

డైరెక్టరేట్ ఆఫ్ అర్బన్ లాండ్ ట్రాన్స్‌పోర్ట్ (DULT) రూపొందించిన ఈ చట్టం బెంగళూరులో త్వరలో అమల్లోకి రానుంది. బృహత్ బెంగళూరు మహానగర పాలిక (బీబీఎంపీ) దీనికి సంబంధించిన డ్రాఫ్ట్‌ను విడుదల చేసింది. నగరంలో ట్రాఫిక్‌, వాహనాల పార్కింగ్ సమస్యను నివారించేందుకు పార్కింగ్ పాలసీ 2.0కు పట్టణ అభివృద్ధి శాఖ ఆమోదించిందని బెంగళూరు నగర పాలిక సంస్థ అధికారులు తెలిపారు.

కొత్త పార్కింగ్ విధానం వల్ల ప్రయోజనాలు:
ఈ నయా పార్కింగ్ పాలసీ అమల్లోకి వస్తే బెంగళూరులో ఇకపై ట్రాఫిక్ నియంత్రణలోకి వస్తుందని అధికారులు భావిస్తున్నారు. నగరవాసులు పబ్లిక్‌ రోడ్లపై ఎక్కడపడితే అక్కడ నిర్లక్ష్యంగా తమ వాహనాలను నిలపాలంటే జంకుతారని పేర్కొన్నారు. ప్రధాన రహదారులతో పాటు చిన్న రోడ్లపైనా వాహనాలు తేలిగ్గా ముందుకు కదలడానికి అవకాశం ఉంటుందని వివరించారు. ఇక అన్నింటికంటే ముఖ్యంగా ఈ విధానం ద్వారా ప్రభుత్వానికి భారీగా ఆదాయం సమకూరనుంది.

LEAVE A REPLY

Please enter your comment!
Please enter your name here