arora akanksha: ఐరాసలో ఆడిట్ కోఆర్డినేటర్.. సెక్రెటరీ జనరల్ పదవికి భారత సంతతి మహిళ పోటీ – indian-origin arora akanksha employee at un announces her candidacy for its secretary-general

0
20


ప్రధానాంశాలు:

  • ఐరాస చీఫ్ ఎన్నిక బరిలో భారతీయ సంతతి మహిళ.
  • కొత్త ఐరాస కోసం మార్పు కావాలని ప్రచారం.
  • గుటెర్రస్‌కు పోటీగా బరిలో నిలిచిన తొలి వ్యక్తి.

ఐక్యరాజ్యసమితి సెక్రెటరీ జనరల్ ఆంటోనియో గుటెర్రెస్ పదవీకాలం ఈ ఏడాది డిసెంబరు 31తో ముగియనుంది. దీంతో కొత్త సెక్రెటరీ జనరల్ ఎన్నికపై అప్పుడే చర్చ మొదలయ్యింది. ఈ నేపథ్యంలో తాను బరిలో ఉంటానని భారతీయ సంతతి మహిళ ప్రకటించి ప్రపంచం దృష్టిని ఆకర్షించారు. ఆమె ఐరాస అధికారి కూడా కావడం మరో విశేషం. ప్రస్తుత సెక్రెటరీ జనరల్ పదవీ కాలం డిసెంబరుతో ముగియనుండగా.. ఆయన రెండోసారి ఆ పదవిని ఆశిస్తున్నారు. అయితే, భారత సంతతికి చెందిన ఆరోరా ఆకాంక్ష మాత్రం తాను చూస్తూ ఉండలేనని, కొత్త ఐరాస కోసం మార్పు కావాల్సిందేనని పేర్కొన్నారు.

ఐరాస సెక్రెటరీ జనరల్ పదవికి తాను పోటీ చేస్తున్నట్టు ఆకాంక్ష ఫిబ్రవరి 9న ప్రకటించారు. తద్వారా ఎన్నికల బరిలో నిలిచిన తొలి వ్యక్తి అయ్యారు. కేవలం ప్రకటనతో ఆగిపోకుండా అరోరాఫర్ఎస్జీ (#AroraForSG) పేరిట ప్రచారాన్ని కూడా మొదలుపెట్టారు. రెండున్నర నిమిషాల వీడియోను తన ట్విట్టర్ ఖాతాలో ఆమె పోస్ట్ చేశారు.

అరోరా ఆకాంక్ష (34) ప్రస్తుత ఐరాస అభివృద్ధి విభాగంలో ఆడిట్ కోఆర్డినేటర్‌ హోదాలో ఉన్నారు. వాస్తవానికి తన లాంటి స్థానంలో ఉన్న వ్యక్తులు ఈ పదవి కోసం పోటీలో నిలవడానికి ఆసక్తి చూపించడం లేదని, దీనికి కారణం తమ వంతు వచ్చే వరకు వేచి చూడడమేనని ఆకాంక్ష ఆవేదన వ్యక్తం చేశారు. ఇప్పటిదాకా ఐరాస అధిపతులుగా పనిచేసివారు సంస్థను బాధ్యతాయుతంగా తీర్చిదిద్దలేదని, సంస్థలో జవాబుదారీ తనాన్ని నింపలేదని దుయ్యబట్టారు.

‘75 ఏళ్లుగా ప్రపంచానికి ఇస్తున్న హామీలను ఐరాస నెరవేర్చలేదు.. శరణార్థులకు రక్షణ లేదు.. మానవతా సాయం కొంత మొత్తమే అందుతోంది..సాంకేతికత, ఆవిష్కరణల్లో చాలా వెనకబడిపోయాం.. అభివృద్ధిని కాంక్షించే ఐక్యరాజ్యసమితే అందరికీ కావాలి.. అందుకే ఐరాస సెక్రటరీ జనరల్‌ పదవికి పోటీ చేస్తున్నాను. నేను అందరిలాగా వెనుకడుగు వేయను.. ఐరాస చేసింది ఉత్తమైందని నేను అంగీకరించను’ అని ఆకాంక్ష అన్నారు.

ఇక, రెండోసారీ పదవిలో కొనసాగేందుకు విజ్ఞప్తి చేస్తానని గుటెర్రస్ ఇటీవలే ప్రకటించారు. ఈ నేపథ్యంలోనే ఆమె పోటీ చేస్తాననడం ప్రాధాన్యత సంతరించుకుంది. ఐరాస సెక్రెటరీ జనరల్‌గా గుటెర్రస్ 2017 జనవరి 1న బాధ్యతలు చేపట్టారు. ఆయన ఐరాసకు తొమ్మిదో సెక్రెటరీ జనరల్.

LEAVE A REPLY

Please enter your comment!
Please enter your name here