Arnab Goswami: నకిలీ టీఆర్పీల కోసం బార్క్ మాజీ సీఈఓకు లక్షలు ముట్టజెప్పిన అర్ణబ్ – republic tv editor in chief arnab goswami paid barc ex-ceo to rig trps says mumbai cops

0
29


టీఆర్పీ కుంభకోణం కేసులో రిపబ్లిక్ టీవీ ఎడిటర్ ఇన్ చీఫ్ అర్ణబ్ గోస్వామి ఆరోపణలు ఎదుర్కొంటున్న విషయం తెలిసిందే. తాజాగా, ఆయనపై ముంబయి పోలీసులు మరో సంచలన ఆరోపణలు చేశారు. బ్రాడ్‌కాస్ట్‌ రిసెర్చ్‌ ఆడియన్స్‌ కౌన్సిల్‌(బార్క్‌) రేటింగ్స్‌లో మోసం కోసం మాజీ సీఈఓ పార్థ్‌ దాస్‌గుప్తాకు అర్ణబ్‌ గోస్వామి లక్షలాది రూపాయలు చెల్లించారని ఆరోపించారు. ఈ మేరకు ముంబయి పోలీసులు ఒక రిమాండ్‌ నోట్‌‌ను విడుదల చేశారు.

‘రిపబ్లిక్‌ టీవీకి అనుకూలంగా బార్క్ మాజీ సీఈఓ దాస్‌గుప్తా వ్యవహరించారు. ఆ చానెల్‌కు టీవీ రేటింగ్‌ పాయింట్స్‌(టీఆర్‌పీ) ఎక్కువ వచ్చేందుకు తన అధికారాన్ని దుర్వినియోగం చేశారు. దీనికి ప్రతిఫలంగా ఆయనకు రిపబ్లిక్‌ టీవీ, రిపబ్లిక్‌ భారత్‌ చానెళ్ల నుంచి లక్షల రూపాయలు అందాయి. 2017 నుంచి 2019 మధ్యలో ఈ కుంభకోణం జరిగింది’ అని పోలీసులు పేర్కొన్నారు.

టీఆర్కీ కుంభకోణం కేసులో అరెస్టయిన బార్క్ మాజీ సీఈఓ పోలీస్ కస్టడీని డిసెంబరు 30 వరకు మెట్రోపాలిటిన్ కోర్టు సోమవారం పొడిగించింది. దాస్‌గుప్తాను డిసెంబరు 24న పోలీసులు అరెస్ట్ చేశారు. ఈ కేసు విచారణ బృందానికి నాయకత్వం వహిస్తోన్న అసిస్టెంట్ పోలీస్ ఇన్‌స్పెక్టర్ సచిన్ వాజే మాట్లాడుతూ.. బార్క్ మాజీ సీఈఓకు పలుసార్లు ముడుపులు చెల్లించినట్టు పోలీసులు ఆధారాలను సేకరించారని తెలిపారు.

‘2017లో పార్థ్ దాస్‌గుప్తాకు ముంబయి లోయర్ పరేల్‌లోని ఓ స్టార్ హోటల్‌లో 6,000 అమెరికా డాలర్లు చెల్లించిన అర్ణబ్ గోస్వామి.. వారి కుటుంబం ఐరోపా ట్రిప్ వెళ్లడానికి స్పాన్సర్ చేశారు.. 2018లో రూ.20 లక్షలు చెల్లించారు.. 2019లో ముంబయి విమానాశ్రయం సమీపంలోని ఓ హోటల్‌లో రూ.10 లక్షలు ముట్టజెప్పారు’ అని వాజే ఆరోపించారు.

అర్ణబ్ గోస్వామి 2017లో రిపబ్లిక్ టీవీని ప్రారంభించి, నకిలీ టీఆర్పీలో నెంబర్ వన్ ఛానెల్‌గా నిలవడానికి దాస్‌గుప్తా సాయం కోరారని వాజే పేర్కొన్నారు. దాస్‌గుప్తాతో అర్ణబ్‌కు 2004 నుంచి పరిచయం ఉందని స్పష్టం చేశారు. ‘తన కార్యాలయంలో దాస్‌గుప్తాకు సహాయం చేసిన వారికి నగదు, బహుమతులు, పదోన్నతులు లభించాయి. బార్క్ సేకరించిన డేటాను అనుకూలంగా మార్చుకోడానికి మోసాలకు పాల్పడ్డారు’ అని వాజే వ్యాఖ్యానించారు.

LEAVE A REPLY

Please enter your comment!
Please enter your name here