actor deep sindhu: నేను నోరు విప్పితే మీ ముఖాలు ఎక్కడ పెట్టుకుంటారు? రైతు నేతలపై నటుడు సంచలన వ్యాఖ్యలు – punjab actor deep sidhu attacks farmer leaders and sensational comments on red fort violence

0
32


ప్రధానాంశాలు:

  • ఎర్రకోట హింసకు నటుడు సిద్ధూ కారణమని ఆరోపణలు.
  • రైతు సంఘాల నేతలపై సంచలన వ్యాఖ్యలు చేసిన దీప్.
  • అహంకారంతోనే నేతలు నిర్ణయాలు తీసుకుంటున్నారని విమర్శలు.

వ్యవసాయ చట్టాలను వ్యతిరేకిస్తూ గత రెండు నెలలుగా ఢిల్లీ సరిహద్దుల్లో ఆందోళనలు నిర్వహిస్తోన్న రైతులు.. రిపబ్లిక్ డే రోజున నిర్వహించిన కిసాన్ పరేడ్ హింసకు దారితీసిన విషయం తెలిసిందే. ట్రాక్టర్ల ర్యాలీలో పాల్గొన్న యువకుడు ప్రమాదవశాత్తు ప్రాణాలు కోల్పోగా.. రైతులు, పోలీసులు పలువురు గాయపడ్డారు. చరిత్రాత్మక ఎర్రకోటను రైతులు ముట్టడించి, త్రివర్ణ పతాకం, రైతు జెండాలను ఎగురవేశారు. అయితే, ఈ మొత్తం వ్యవహారం పంజాబీ నటుడు, గాయకుడు దీప్ సిద్ధూ మెడకు చుట్టుకుంది.

ఆయన రెచ్చగొట్టడంతోనే రైతులు సంయమనం కోల్పోయారనే ఆరోపణలు ఎదురవుతున్నాయి. హింసకు కారకుడు దీప్ సిద్ధూ అంటూ రైతు సంఘాలు నేతలు కూడా ఆరోపించారు. ఈ నేపథ్యంలో రైతు సంఘాల నేతలపై దీప్ సిద్ధూ సంచలన వ్యాఖ్యలు చేశారు. వారి రహస్యాలను తాను బయటపెడితే తలలు ఎక్కడ పెట్టుకుంటారంటూ నిలదీశారు. గురువారం ఆయన ఫేస్ బుక్ లైవ్ ద్వారా మాట్లాడుతూ.. తనపై చేసిన ఆరోపణలను తోసిపుచ్చారు. ‘

సిగ్గులేకుండా నాపై మీరు నింద మోపారు. మీ నిర్ణయంతోనే ట్రాక్టర్ ర్యాలీకి జనం తరలివచ్చారు. వాళ్లంతా మీ మాటలనే అనుసరించారు. లక్షలాది మంది నా నియంత్రణలో ఎలా ఉంటారు? అంతమందిని నేనే రెచ్చగొట్టి ఉంటే మీరంతా ఎక్కడ ఉంటారు? అసలు దీప్ సిద్ధూకు అనుచరులే లేరు, ఉద్యమంలో అతడి పాత్ర ఏమీ లేదని మీరే చెప్పారు కదా. అలాంటప్పుడు లక్షలాది మందిని నేనెలా తీసుకురాగలను?’అని దీప్ సిద్ధూ మండిపడ్డారు.

తాను ఇప్పటికీ సింఘూ సరిహద్దుల్లోనే ఉన్నానని, రైతు నేతల కీలక రహస్యాలను తాను బట్టబయలు చేస్తే వారి ముఖాలు ఎక్కడ పెట్టుకుంటారని ఆగ్రహం వ్యక్తం చేశారు. ఎర్రకోటలోకి ప్రవేశించి ఆందోళనలు చేసిన రైతులపై విమర్శలు చేసే కన్నా మద్దతు ఇస్తే బాగుంటుందని ఆయన వ్యాఖ్యానించారు. అక్కడ ఆందోళనలు చేసిన వారికి రైతు నేతలు ఎందుకు మద్దతు తెలపలేదని ఆయన ప్రశ్నించారు. వారికి మద్దతిచ్చి ఉంటే ప్రభుత్వంపై మరింత ఒత్తిడి తీసుకురాగలిగేవాళ్లమని అన్నారు. నవంబర్ 26న బారికేడ్లను నెట్టుకుని ఢిల్లీలోకి ప్రవేశించి కేంద్ర ప్రభుత్వాన్ని మేల్కొలిపామని, జనవరి 26న మరోసారి మేల్కొలిపామని అన్నారు.

తాను ఆరెస్సెస్ ఏజెంట్ అన్న ఆరోపణలపైనా ఆయన వివరణ ఇచ్చారు. ఒకవేళ తాను ఆరెస్సెస్ ఏజెంట్ లేదా బీజేపీ వ్యక్తిని అయి ఉండి, ఎన్నికల్లో పోటీ చేయాలనుకుంటే ఎర్రకోటపై నిషాన్ సాహిబ్ జెండాను ఎందుకు ఎగరేలా చేస్తాను? కనీసం ఈ విషయం గురించి ఆలోచించండి? అని ప్రశ్నించారు. ఎర్రకోట వద్ద ఆందోళన చేసిన వారందరినీ దేశ ద్రోహులుగా చిత్రీకరించే ప్రయత్నం చేస్తున్నారన్నారు. తాను రైతులు ఉద్యమాన్ని నీరుగార్చడానికి తాను ప్రయత్నించడంలేదని, రైతు సంఘాల నేతల అహంకారమే ఇలా మాట్లాడిస్తోందని దుయ్యబట్టారు.

‘అహంకారం తలకెక్కిన రైతు నేతలు ఎవరు చెప్పినా వినిపించుకోవడంలేదు.. వాళ్లు ఏ నిర్ణయం తీసుకున్నా అందరూ దానిని అంగీకరించాలి.. మీ రహస్యాలను బయటపెడితే వారికి తప్పించుకునే మార్గం ఉండదు’ అని సంచలన వ్యాఖ్యలు చేశారు. ఎర్రకోట గేట్లు విరగ్గొట్టిన తర్వాతే నేను అక్కడకు చేరుకున్నాను.. అప్పటికి రైతు సంఘాలు నేతలు ఎవరూ లేరు అన్నారు. అయితే, రైతులు మాత్రం సిద్ధూను ప్రభుత్వం ఏజెంట్ అని ఆరోపించారు. ప్రధాని నరేంద్ర మోదీని బీజేపీ ఎంపీ సన్నీడియోల్‌తో కలిసి ఉన్న ఫోటో సోషల్ మీడియాలో వైరల్ కావడంతో దీనికి మరింత బలం చేకూరింది. గత లోక్‌సభ ఎన్నికల్లో సన్నీడియోల్ తరఫున సిద్ధూ ప్రచారం నిర్వహించారు.

LEAVE A REPLY

Please enter your comment!
Please enter your name here