4g services in kashmir: ఏడాదిన్నర తర్వాత కశ్మీర్‌లో 4జీ సేవలు పునరుద్ధరణ.. షరతులు వర్తిస్తాయ్! – 4g internet services restored in jammu and kashmir after 18 months

0
24


ప్రధానాంశాలు:

  • కశ్మీర్‌లో 4జీ సేవల పునరుద్ధరణపై కీలక నిర్ణయం.
  • ఆర్టికల్ 370 రద్దుతో నిలిచిపోయిన ఇంటర్నెట్ సేవలు.
  • ప్రయోగాత్మకంగా ఆరు నెలల కిందట రెండు జిల్లాల్లో 4జీ.

దాదాపు ఏడాదిన్నర తర్వాత జమ్మూ కశ్మీర్‌లో తిరిగి 4జీ ఇంటర్నెట్ సేవలను శుక్రవారం పునరుద్ధరించారు. జమ్మూ కశ్మీర్‌కు ప్రత్యేక హోదా కల్పించే ఆర్టికల్ 370ను 2019 ఆగస్టు 5న కేంద్రం రద్దుచేసిన విషయం తెలిసిందే. భద్రతా కారణాల దృష్ట్యా అప్పటి నుంచి 4జీ సేవలను నిలిపివేసి.. దీనికి బదులుగా 2జీ సర్వీసులను తిరిగి ప్రారంభించారు. ప్రస్తుతం పూర్తిస్థాయి పరిస్థితిపై అంచనాకు వచ్చిన తర్వాత 4జీ సేవలను పునరుద్దరించాలని ప్రభుత్వం నిర్ణయించింది.

గతేడాది ఆగస్టులో ప్రయోగాత్మకంగా గండేర్బల్, ఉధమ్‌పూర్ జిల్లాల్లో 4 జీ సేవలను పునరుద్దరించగా.. మిగతా 18 జిల్లాల్లో 2జీ సేవలు కొనసాగుతున్నాయి. తాజా ఉత్తర్వుల ప్రకారం పదిహేను రోజుల్లోగా ఈ 18 జిల్లాల్లో 4జీ సేవలను పునరుద్దరించనున్నారు.

‘సుప్రీంకోర్టు సూచనతో నియమించిన ప్రత్యేక కమిటీ సలహా ప్రకారం పూర్తి శ్రద్ధతో భద్రత పరిస్థితిని సమీక్షించి మొబైల్ డేటా సర్వీసులు, అంతర్జాల కనెక్టివిటీలపై కొనసాగుతున్న నిషేధాన్ని తొలగించాలని నిర్ణయించాం.. పోస్ట్‌పెయిడ్ కనెక్షన్‌లకు వర్తించే నిబంధనల ప్రకారం ధ్రువీకరణ తర్వాత మాత్రమే ప్రీ-పెయిడ్ హోల్డర్లకు ఇంటర్నెట్ సౌకర్యం కల్పిస్తాం’అని జమ్మూ కశ్మీర్ హోం శాఖ తన ఆదేశాల్లో పేర్కొన్నారు.

భద్రతా సంస్థల ఆందోళనలు, భయాలను గమనించిన తరువాత గండేర్బల్, ఉధమ్‌పూర్ హై స్పీడ్ మొబైల్ ఇంటర్నెట్ కనెక్టివిటీని ప్రారంభించి అంచనా వేసిన తరువాత ఈ ఉత్తర్వులు జారీ చేశారు. గతేడాది ఆగస్టులో జమ్మూ కశ్మీర్ లెఫ్టినెంట్ గవర్నర్‌గా మనోజ్ సిన్హా బాధ్యతలు స్వీకరించినప్పటి నుంచి ప్రత్యేక కమిటీ నిషేధంపై సమీక్షను నిర్ధారించిన తరువాత 4జీ సేవలను పునరుద్ధరించడానికి ఆమోదం తెలిపారు. ఇక, కశ్మీర్‌లో ఇంటర్నెట్ సేవలను నిలిపివేయడంపై సుప్రీంకోర్టు సైతం తీవ్రంగా మండిపడింది.

జమ్మూ కశ్మీర్‌కు ప్రత్యేక హక్కులు కల్పించే రాజ్యాంగంలోని ఆర్టికల్ 370, 35ఏలను రద్దుచేసిన తర్వాత ఎలాంటి అవాంఛనీయ ఘటనలు చోటుచేసుకోకుండా ముందస్తు చర్యల్లో భాగంగా ఇంటర్నెట్ సేవలను కేంద్రం నిలిపివేసింది. నెలలు గడిచిపోయినా వాటిని పునరుద్దరించకపోవడంతో పలువురు సుప్రీంకోర్టును ఆశ్రయించారు. ఈ పిటిషన్లపై విచారణ పూర్తిచేసిన సర్వోన్నత న్యాయస్థానం కశ్మీర్‌లో ఇంటర్నెట్ సేవలు నిలపివేయడంపై ఉత్తర్వులను సమీక్షించాలని గతేడాది జనవరి 10న ప్రభుత్వాన్ని ఆదేశించింది. అన్ని ప్రభుత్వం వెబ్‌సైట్‌లను పునరుద్దరించాలని ఆదేశాలు జారీచేసింది.

LEAVE A REPLY

Please enter your comment!
Please enter your name here