16 crore injection: ఈ పాప బతకాలంటే రూ.16 కోట్ల ఇంజెక్షన్ కావాలి.. చివరి దాకా వచ్చారు! – mumbai baby suffering with rare genetic disorder needs rs 16 crore injection

0
43


5 నెలల చిన్నారి. అందంగా నవ్వులు చిందిస్తోంది. కానీ, ఆ నవ్వుల వెనుక ఆ పాపకు తెలియని తీవ్రమైన విషాదం ఉంది. ఆ చిన్నారి అరుదైన వ్యాధితో బాధపడుతోంది. చిన్న వయసులోనే ఎంతో బాధను అనుభవిస్తోంది. ఆ వ్యాధి నుంచి బయటపడాలంటే ఆ పాపకు రూ.16 కోట్ల ఇంజెక్షన్ ఇవ్వాలి. అది కూడా అమెరికా నుంచి తెప్పించాలి. విరాళాలు పోగయ్యాయి. ఇక ఇంజెక్షన్ రావడమే. మరి పాప బతుకుతుందా? ముంబైకి చెందిన ఆ చిన్నారికి వచ్చిన అరుదైన వ్యాధి ఏంటి? ఆ వివరాలు..

మనలో చాలా మంది క్యాన్సర్ ప్రమాదకరమైన వ్యాధి అనుకుంటారు. క్యాన్సర్ కలిగించే బాధతో పాటు దాని చికిత్సకయ్యే ఖర్చు కూడా అందుక్కారణం. కానీ, క్యాన్సర్ కంటే ప్రమాదకరమైన వ్యాధులు ఉన్నాయి. కానీ, అవి లక్షల్లో ఏ ఒక్కరికో వస్తాయి. అలాంటి ఒక వ్యాధే ‘స్పైనల్ మస్కులర్ అట్రోఫీ’.

వెన్నెముక కండరాల క్షీణత ఈ వ్యాధి ప్రధాన లక్షణం. SMAలో టైప్-1 చాలా డేంజర్. ఈ చిన్నారి ప్రస్తుతం ఇదే వ్యాధితో బాధపడుతోంది. దీని చికిత్స కోసం ‘జాల్ గెన్జ్ మా’ అనే ఇంజెక్షన్ ఇవ్వాలి. దాని రేటు వింటేనే గుండెలు జారిపోతాయి. ఆ ఇంజక్షన్ ఖరీదు అక్షరాల 16 కోట్ల రూపాయలు.

ముంబైకి చెందిన దంపతులు మిహిర్ (35), ప్రియాంక కామత్ (33)కు గతేడాది ఆగస్టు 15కు ఒక రోజు ముందే ఆ పాప పుట్టింది. తమ గారాలపట్టీకి ‘తీరా (Teera)’ అని పేరు పెట్టుకున్నారు. ఆమె అరుదైన వ్యాధితో బాధ పడుతోందని తెలిశాక తీవ్ర విషాదంలో కూరుకుపోయారు.

ఆ పాపకు 6 నెలల లోపు ఇంజక్షన్ వేయించాలి. ప్రస్తుతం ఆమె వయసు ఐదు నెలులు. అంటే.. ఇంకా కొన్ని రోజులే మిగిలి ఉన్నాయి. భార్యాభర్తలిద్దరూ ఉద్యోగాలు చేస్తూ సాధారణ జీవితం గడుపుతున్న ఆ దంపతులకు ఆ ఇంజక్షన్ కొనడం తలకు మించిన భారమే. వారి ఆస్తులన్నీ అమ్మినా.. అందులో పది శాతం డబ్బులు కూడా రావు. కానీ, ఆత్మవిశ్వాసంతో విరాళాల కోసం ప్రయత్నించారు. సోషల్ మీడియాలో పోస్టులు పెట్టారు. క్రౌడ్ ఫండింగ్ వెబ్‌సైట్ల ద్వారా విరాళాలు పోగు చేశారు.

మొత్తానికి ఆ పదహారు కోట్లను జమచేశారు. ఇక మిగిలింది ఇంజక్షన్ తెప్పించడమే. డాక్టర్లు ఇప్పుడు ఆ ప్రయత్నాల్లోనే ఉన్నారు. ఆ ఇంజెక్షన్‌తో సమస్య పూర్తిగా పరిష్కారం కాదంటున్నారు. కాకపోతే.. కొంత వరకు బెటర్. ప్రాణాలైతే దక్కుతాయి. నరాలు బలహీనమై ఆహారం తీసుకోవడానికి ఇబ్బంది పడుతున్న తీరా రోజు రోజుకూ బక్కచిక్కుతోంది. పైగా ఆ చిన్నారి ఊపిరితిత్తుల్లో ఇప్పటికే ఒకటి పని చేయడం మానేసింది. తీరాను ప్రస్తుతం వెంటిలేటర్‌పై ఉంచారు. అలా ఎక్కువ కాలం పెడితే ఇన్ఫెక్షన్లు వచ్చే ప్రమాదం ఉందంటున్నారు.

ఇవేమీ తెలియని తీరా చిరు నవ్వులు చిందిస్తోంది. పెద్ద పెద్ద కళ్లతో అందరినీ చూస్తోంది. తీరా ముఖంలో ఆ చిరునవ్వు కలకాలం ఉండాలనే అందరి కోరిక. మరి ఏమవుతుంది? మరి కొద్ది రోజుల పాటు మన ప్రార్థనలు కొనసాగించాల్సిందే.

Must Read:స్పైనల్ మస్క్యులర్ అట్రోపీ అంటే ఏమిటి? ఆ పాప సమస్యను ఎలా గుర్తించారు?

LEAVE A REPLY

Please enter your comment!
Please enter your name here