10 కోట్లు ఇవ్వకుంటే ఆ ఫొటోలు నెట్‌లో పెడతా.. షాక్, అలా చేసింది కొడుకే!

0
33



ది కోట్ల రూపాయలు ఇవ్వకపోతే మీ వ్యక్తిగత ఫొటోలను ఆన్‌లైన్‌లో పెట్టేస్తా.. యూపీలోని ఘజియాబాద్‌కు చెందిన ఓ వ్యక్తికి వచ్చిన ఓ ఇ-మెయిల్ సారాంశం ఇది. తన మెయిల్‌ను ఎవరో హ్యాక్ చేశారని, బెదిరింపు సందేశాలు పంపిస్తున్నారని ఆయన పోలీసులను ఆశ్రయించారు. తన ఇంట్లో జరిగే విషయాలన్నీ హ్యాకర్‌కు తెలిసిపోతున్నాయనీ పోలీసులతో చెప్పారు. తమ వ్యక్తిగత వివరాలన్నింటినీ ఇంటర్నెట్‌లో పెట్టేస్తానని బెదిరిస్తున్నాడని చెప్పారు. దర్యాప్తు ప్రారంభించిన పోలీసులు ఆ హ్యాకర్ ఐపీ అడ్రస్‌ను పట్టుకున్నారు. షాకింగ్ ట్విస్ట్ ఏమిటంటే, ఆ అడ్రస్ ఆ ఫిర్యాదు చేసిన వ్యక్తి ఇంట్లోనే ఉంది.

బాధితుడి ఇంట్లో ఉండే వాళ్లందరి గురించి పోలీసులు ఆరా తీశారు. ఐదో తరగతి చదువుతున్న వారి 11 ఏళ్ల బాలుడి ప్రవర్తనా తీరు అనుమానాస్పదంగా కనిపించింది. దీంతో అతడిని అదుపులోకి తీసుకొని విచారించారు. ఆ బాలుడు చెప్పిన విషయాలు విని పోలీసులు నోరెళ్లబెట్టారు.

తండ్రి ఇ-మెయిల్‌ను హ్యాక్ చేసి బెదిరింపు సందేశాలు పంపించాడు ఆ బాలుడు. ఇ-మెయిల్ పాస్‌వర్డ్ కూడా మార్చేశాడు. ఇంట్లో వాళ్ల ప్రైవేట్ ఫొటోలను సెల్‌ ఫోన్లో రహస్యంగా చిత్రీకరించి వాటిని తండ్రికి మెయిల్ చేశాడు. పది కోట్ల రూపాయలు పంపించకపోతే ఆ ఫొటోలను ఇంటర్నెట్‌లో పెడతానని బెదిరించాడు.

ఇదంతా ఎలా నేర్చుకున్నాడు?
ఐదో తరగతి చదువుతున్న ఆ బాలుడు ఇంటర్నెట్‌లో సెర్చ్ చేసి సైబర్ క్రైమ్ గురించి తెలుసుకున్నాడు. పట్టుబడకుండా ఎలాంటి జాగ్రత్తలు తీసుకోవాలో నేర్చుకున్నాడు. సైబర్ క్రైమ్‌కు సంబంధించి పదుల సంఖ్యలో యూట్యూబ్ వీడియోలను చూశాడు. ఆ విద్యనంతా కన్నతండ్రిపైనే ప్రదర్శించాడు. అది కూడా జనవరి 1నే మొదలుపెట్టాడు. తండ్రి ఇ-మెయిల్‌ను హ్యాక్ చేసి బెదిరింపు సందేశాలు పంపించడం ప్రారంభించాడు.

11 ఏళ్ల కుమారుడి తెలివి చూసి ఆనందపడాలో, ఏడ్వాలో తెలియని గందరగోళంలో ఆ తల్లిదండ్రులు ఉన్నారు. పోలీసులు ఘటనపై కేసు నమోదు చేసి దర్యాప్తు కొనసాగిస్తున్నారు.

ఇంటర్నెట్, స్మార్ట్ ఫోన్ల కారణంగా పిల్లలు ఎలా పెడదారి పడుతున్నారనడానికి తార్కాణం ఈ ఘటన. ఇది నాణేనికి రెండో కోణం. టెక్నాలజీ వల్ల ఎంత ఉపయోగం ఉందో, అంతే నష్టం కూడా ఉంది. దాన్ని సరైన విధంగా వాడినప్పుడే సమాజానికి ఉపయోగపడే ఫలితాలు వస్తాయి. తల్లిదండ్రులందరికీ ఈ ఘటన ఒక పాఠం..!

LEAVE A REPLY

Please enter your comment!
Please enter your name here