శ్రీనగర్ ఎన్‌కౌంటర్‌పై అనుమానాలు.. వారు ఉగ్రవాదులు కాదంటున్న కుటుంబసభ్యులు

0
26



జమ్మూ-కశ్మీర్‌లోని శ్రీనగర్‌ శివారు పరింపొరా ప్రాంతంలో జరిగిన ఎదురుకాల్పుల్లో ముగ్గురు ఉగ్రవాదులు హతమైనట్టు పోలీసులు బుధవారం వెల్లడించిన విషయం తెలిసిందే. మంగళవారం సాయంత్రం భద్రతా దళాలు తనిఖీలు నిర్వహిస్తుండగా ఉగ్రవాదులు వారిపై కాల్పులు జరిపినట్లు తెలిపారు. అయితే, ఉగ్రవాదుల కుటుంబాలు మాత్రం తమ పిల్లలు అమాయకులని వారికి ఏ పాపం తెలియదని అంటున్నారు. వీరిలో పోలీస్ అధికారి కుమారుడు కూడా ఉన్నాడని, ఇది బూటకపు ఎన్‌కౌంటర్ అని మండిపడుతున్నారు. భద్రతా దళాల కాల్పుల్లో చనిపోయిన వారిలో ఒకరు ఇంటర్ చదువుతున్నట్టు తెలిపారు.

జమ్మూ కశ్మీర్ పోలీసులు, సైన్యం సంయుక్తంగా ఈ ఆపరేషన్‌ చేపట్టాయి. మంగళవారం సాయంత్రం ప్రారంభమైన ఈ ఎన్‌కౌంటర్ ముగ్గురు ఉగ్రవాదులు మృతి చెందినట్లు పోలీసులు ప్రకటించారు. కానీ, పోలీస్ రికార్డుల్లోని ఉగ్రవాదుల జాబితాలో వీరి పేర్లు లేవని తెలిపింది. తమ వద్ద ఉన్న ఉగ్రవాదుల జాబితాలో ఈ పేర్లు లేవని, వీరంతా ఉగ్రవాదులకు సానుభూతిపరులని (ఓడబ్ల్యూజీ) పేర్కొంది.

బుధవారం జరిగిన ఎన్‌కౌంటర్‌లో పుల్వామాకు చెందిన అజాజ్ మక్బూల్ గనీ, అథీర్ ముస్తాఖా, సోఫియాన్‌కు చెందిన జుబైర్ లోనేగా గుర్తించారు. అయితే, వీరిలో అజాజ్ మక్బూల్ తండ్రి గండేర్బల్ జిల్లాలో ఓ హెడ్ కానిస్టేబుల్‌గా పనిచేస్తున్నాడని అతడి బంధువులు వెల్లడించారు. పాకిస్థాన్ ఉగ్రవాదులు సోఫియాన్‌లో ఓ ఆర్మీ అధికారి, ముగ్గురు పౌరులను హత్యచేసిన ఘటనపై పోలీసులు ఛార్జ్‌షీట్ దాఖలు చేసిన నాలుగు రోజుల్లోనే ఈ ఎన్‌కౌంటర్ చోటుచేసుకుంది.

అమాయకులను కాల్చి చంపారనే ఆరోపణలు రావడంతో సైన్యాన్ని ఆర్మీ విచారించగా.. వారి వద్ద ఆయుధాలు లభించాయని చెప్పారు. కానీ, మూడు మృతదేహాల వద్ద ఆయుధాలను సైన్యం ఉంచినట్టు దర్యాప్తులో తెలింది. బుధవారం జరిగిన ఎన్‌కౌంటర్‌లో రెండు తుపాకులు, ఓ రైఫిల్ స్వాధీనం చేసుకున్నట్టు పోలీసులు వెల్లడించారు. అలాగే, వారు కుటుంబాలు చేస్తున్న ఆరోపణలును ఖండించారు. సాధారణంగా తల్లిదండ్రులకు ఈ కార్యకలాపాల గురించి తెలియదని, కొంతమంది ఓడబ్ల్యూజీలు కుటుంబంతోనే కలిసి ఉంటూ గ్రానెడ్లు విసరడం, కాల్పులకు పాల్పడటం వంటి ఉగ్రవాద తరహా నేరాలకు పాల్పడతారని పేర్కొన్నాయి.

LEAVE A REPLY

Please enter your comment!
Please enter your name here