రైతులతో చర్చలు.. ట్విస్ట్ ఇచ్చిన కేంద్రం

0
36



నూతన వ్యవసాయ చట్టాలకు వ్యతిరేకంగా ఆందోళన నిర్వహిస్తున్న రైతులతో కేంద్ర ప్రభుత్వం మరోసారి చర్చలు జరపడానికి సిద్ధమైంది. చర్చలకు ఆహ్వానిస్తూ రైతు సంఘాల ప్రతినిధులకు లేఖ రాసింది. అయితే.. చిన్న ట్విస్టు ఇచ్చింది. డిసెంబర్ 29న ఉదయం 11 గంటలకు చర్చలకు వస్తామని రైతులు ఇప్పటికే వర్తమానం పంపగా.. కేంద్రం 30న రావాలని రైతు సంఘాలను కోరింది. ఆ రోజు మధ్యాహ్నం ఢిల్లీలోని విజ్ఞాన్‌ భవన్‌లో 2 గంటల నుంచి చర్చలు జరిపేందుకు రావాలంటూ 40 రైతు సంఘాలకు కేంద్ర వ్యవసాయ శాఖ సోమవారం (డిసెంబర్ 28) లేఖ రాసింది.

ఆరో దఫా చర్చలకు రావాలంటూ కేంద్ర వ్యవసాయ శాఖ జాయింట్ సెక్రటరీ వివేక్ అగర్వాల్ నాలుగు రోజుల కిందట రైతు సంఘాలకు లేఖ రాసిన విషయం తెలిసిందే. అంతేకాదు, చర్చలకు ఎప్పుడో రావాలనే అంశంపై తుది నిర్ణయం రైతులదేనని.. వారు ఎప్పుడు అంటే అప్పుడు చర్చలకు సిద్ధమని ఆ లేఖలో రాశారు.

వివేక్ అగర్వాల్ రాసిన లేఖ అంశంపై చర్చలు జరిపిన సంయుక్త కిసాన్‌ మోర్చా చర్చలకు సిద్ధమేనంటూ లేఖ రాసింది. ఈ నెల 29న ఉదయం 11 గంటలకు చర్చలకు వస్తామని తెలిపింది. ఈ నేపథ్యంలో కేంద్ర వ్యవసాయ శాఖ తాజాగా రాసిన లేఖలో రైతులను 30న చర్చలకు ఆహ్వానించడం చర్చనీయాంశంగా మారింది.

మరోవైపు.. రైతు సంఘాల ప్రతినిధులు కేంద్రం ముందు 4 డిమాండ్లు పెట్టారు. వాటిలో వ్యవసాయ చట్టాలను రద్దు చేయాలనేది ప్రధానమైంది. నాలుగు డిమాండ్లనూ ఎజెండాలో చేరిస్తేనే చర్చలకు వస్తామని స్పష్టం చేశారు. ఈ సారైనా చర్చలు పురోగతి దిశగా సాగుతాయా.. వేచి చూడాలి.

LEAVE A REPLY

Please enter your comment!
Please enter your name here