మహారాష్ట్రలో మళ్లీ కరోనా: ముంబైలో భారీగా కేసులు.. పలువురికి రెండోసారి పాజిటివ్

0
27



హారాష్ట్రలో కరోనా వైరస్ మళ్లీ అలజడి రేపుతోంది. ఆ రాష్ట్ర రాజధాని ముంబైలో పరిస్థితి ఆందోళనకరంగా మారుతుంది. పాజిటివ్ కేసులు అంతకంతకూ పెరుగుతున్నాయి. గడిచిన 24 గంటల్లో నగరంలో కొత్తగా 2,749 కరోనా కేసులు నమోదయ్యాయి. దీంతో బృహన్ ముంబై మున్సిపల్ కార్పొరేషన్ (BMC) మరోసారి కఠిన చర్యలకు ఉపక్రమించింది. నగరంలో 1,305 భవనాలను మూసివేసినట్లు తెలిపింది.

మూసివేసిన భవనాల్లోని ఫ్లాట్లు, ఇళ్లలో మొత్తం 71,838 మంది ప్రజలు నివాసం ఉంటున్నట్లు బీఎంసీ వెల్లడించింది. ఆయా భవనాల్లో పాజిటివ్ కేసులు నిర్ధారణ కావడంతో మూసివేసినట్లు తెలిపింది. వైరస్ వ్యాప్తి నియంత్రణకు ఈ నిర్ణయం తీసుకున్నట్లు వివరించింది. కొవిడ్ పరీక్షల సంఖ్యను కూడా భారీగా పెంచినట్లు తెలిపింది.

ముంబైలో శుక్రవారం 823 పాజిటివ్ కేసులు నమోదయ్యాయి. గత మూడు నెలల్లో ఒకే రోజు అత్యధిక కరోనా కేసులు నమోదు కావడం ఇదే తొలిసారి. శనివారానికి ఈ సంఖ్య అనూహ్యంగా పెరిగింది. ఒకే రోజు 2,749 కేసులు నమోదయ్యాయి. ఇది ముంబైవాసులను ఆందోళనకు గురిచేస్తోంది. ముంబైలో కొవిడ్ కారణంగా ఇప్పటికే 11,435 మంది మరణించారు.

రెండోసారి కరోనా పాజిటివ్..
మ‌హారాష్ట్రలో కరోనా విజృంభిస్తున్న వేళ పలువురికి రెండోసారి పాజిటివ్‌గా నిర్ధారణ అవుతోంది. ఎన్‌సీపీ సీనియ‌ర్‌ నాయ‌కుడు, మాజీ మంత్రి ఏక్‌నాథ్ ఖ‌డ్సేకు క‌రోనా పాజిటివ్‌గా తేలింది. ఆయనకు క‌రోనా వైర‌స్ సోక‌డం ఇది రెండోసారి. ఖడ్సేతో పాటు ప్రస్తుతం మ‌హాకూట‌మిలో మంత్రిగా ఉన్న బ‌చ్చూ క‌దూకి కూడా రెండోసారి కరోనా సోకింది. ప్రస్తుతం వారిద్దరూ హోమ్ ఐసోలేష‌న్‌లో ఉన్నట్లు విడివిడిగా ప్రకటించారు.

మరోవైపు.. మహారాష్ట్రలో కరోనా వైరస్ మళ్లీ పంజా విసురుతుండటంతో పొరుగు రాష్ట్రాలు అప్రమత్తమయ్యాయి. ఆ రాష్ట్రం నుంచి వచ్చే వారు తప్పనిసరిగా కరోనా నెగటివ్ రిపోర్టు సమర్పించాలని కర్ణాటక ప్రభుత్వం ఉత్తర్వులు జారీ చేసింది. దేశంలోని ప్రధాన నగరాల్లో ఇప్పటికే ఈ నిబంధనలను అమలు చేస్తున్నారు.

LEAVE A REPLY

Please enter your comment!
Please enter your name here