బైడెన్‌కు నిరాశ.. 40 ఏళ్లు ప్రయాణించిన ఆ రైల్లోకి అనుమతి నిరాకరణ!

0
20



అమెరికా 46వ అధ్యక్షుడిగా డెమొక్రాటిక్ నేత బుధవారం (జనవరి 20న) బాధ్యతలు చేపట్టనున్నారు. అయితే, ప్రమాణస్వీకారానికి తన సొంత పట్టణం డెలావర్‌లోని విల్ మింగ్టన్ నుంచి రాజధాని వాషింగ్టన్‌కు రైల్లో వెళ్లేందుకు బైడెన్ ఏర్పాట్లు చేసుకున్నారు. కానీ, ప్రస్తుత పరిస్థితుల్లో రైలు ప్రయాణం అంత సురక్షితం కాదని భద్రతా సిబ్బంది ఆయనకు అనుమతి నిరాకరించింది. క్యాపిటల్ భవనంపై దాడి నేపథ్యంలో రైలు ప్రయాణం సురక్షితం కాదని స్పష్టం చేశాయి. దీంతో అధ్యక్షుడిగా బాధ్యతలు స్వీకరించే ముందే రైలులో ప్రయాణించాలనే తన కోరికను బైడెన్ వదులుకోవాల్సి వస్తోంది.

గత 40ఏళ్లుగా రాజకీయాల్లో కొనసాగుతున్న బైడెన్.. తొలిసారి 1972లో డెలావర్ నుంచి సెనెటర్‌గా ఎన్నికయ్యారు. అప్పటి నుంచి ఆయన ఈ రైల్లోనే ప్రయాణం చేస్తున్నారు. తన మొదటి భార్య, కుమార్తె ఓ ప్రమాదంలో చనిపోయిన తర్వాత ఇద్దరు కొడుకుల బాధ్యతలను తన భుజాలపై వేసుకుని, వారి కోసం ఈ రైల్లో నిత్యమూ రాకపోకలు సాగించారు. ఒబామా హయాంలో ఉపాధ్యక్షుడిగా ఉన్నప్పుడు కూడా బైడెన్ ఈ రైలు ప్రయాణాన్ని వదిలిపెట్టలేదు. అందుకే జో సహచరులు ‘ఆమ్ ట్రక్ జో’ అని ఆయన్ను ఆటపట్టిస్తుంటారు.

ఉపాధ్యక్షుడిగా ఉన్నప్పుడే 2011లో విల్ మింగ్టన్ స్టేషన్ పేరును జోసెఫ్ ఆర్ బైడెన్ జూనియర్ రైల్ రోడ్ స్టేషన్ అని పేరు పెట్టారు. తన జీవితంలో భాగస్వామ్యమైన ఈ రైలులో బాధ్యతలు స్వీకరించేందుకు వెళ్లలేకపోతున్నందుకు బైడెన్ చాలా బాధపడుతున్నారు.

‘నేను ఈ రైల్లో దాదాపు 8,200 ట్రిప్పులు తిరిగాను. అంటే మొత్తం 20 లక్షల మైళ్లు ప్రయాణించినట్టు.. గడచిన 36 ఏళ్లలో ఎన్నో పుట్టిన రోజు వేడుకలు చేసుకునేందుకు రాత్రి వచ్చేసరికి ఇంటికెళ్లి పిల్లలకు కథలు చెప్పేందుకు ఈ రైలు సహకరించింది. నా ఎన్నో పనులను సాధ్యం చేస్తూ, విలువైన అనుభూతులను మిగిల్చింది. నా కష్టాల్లో, సుఖాల్లో భాగమైంది’ బైడెన్ వ్యాఖ్యానించారు.

మరోవైపు, బైడెన్ ప్రమాణస్వీకారం వేళ అల్లర్లు చెలరేగే అవకాశం ఉందన్న నిఘా వర్గాల హెచ్చరికలతో రాజధాని వాషింగ్టన్ డి.సి ప్రాంతం.. పూర్తిగా మిలిటరీ జోన్‌ను తలపిస్తోంది. అమెరికా చరిత్రలోనే అత్యంత కట్టుదిట్టమైన భద్రతా ఏర్పాట్లు జరుగుతున్నాయి. ఇప్పటి వరకు బయట వ్యక్తుల నుంచి ముప్పు ఉందని భావించిన భద్రతా బలగాలు.. తాజాగా ఎఫ్‌బీఐ నుంచి వచ్చిన హెచ్చరికతో మరింత ఆందోళనకు గురవుతున్నాయి. భద్రతా బలగాల్లోని వారే నిరసనలకు ఉసిగొల్పే ప్రమాదం ఉందని నిఘా వర్గాలు హెచ్చరించాయి. ఈ నేపథ్యంలో దళాల్లో ప్రతి సభ్యుడు అత్యంత అప్రమత్తతతో వ్యవహరించాలని ఉన్నతాధికారులు ఆదేశించారు.

LEAVE A REPLY

Please enter your comment!
Please enter your name here