ప్రియుడితో పారిపోయిన మహిళ.. హత్యకు గురైందని అత్తింటివారికి జైలు, చివరికి ట్విస్ట్!

0
27



బిహార్‌‌లో ఓ షాకింగ్ ఘటన వెలుగులోకి వచ్చింది. హత్యకు గురైందని భావించిన ఓ మహిళ ఆచూకీ ఏడాది తర్వాత దొరికింది. అయితే.. అత్తింటి వారే ఆమెను అదనపు కట్నం కోసం వేధించి హత్య చేశారని పోలీసులు కేసు నమోదు చేసి ఇప్పటికే ఐదుగురిని జైలుకు తరలించారు. వారి స్టేట్‌మెంట్లను కూడా రికార్డు చేశారు. తాజాగా ఆ మహిళ బతికే ఉందని తెలియడంతో నోరెళ్లబెట్టారు. పోలీసుల పనితీరుపై విమర్శల వర్షం కురిపిస్తున్న ఈ ఘటనకు సంబంధించిన వివరాలు ఇలా ఉన్నాయి..

బిహార్‌‌లోని సరణ్‌ జిల్లాకు చెందిన స్వీటీ కుమారీ అనే మహిళ 2019 మేలో కనిపించకుండాపోయింది. మహిళతో పాటు ఆమె కుమారుడు పవన్‌ (7) కూడా కనిపించకుండాపోయాడు. రెండు రోజుల తర్వాత అక్కడికి సమీపంలోని దాబ్రా నదీ తీరంలో ఓ మహిళ మృతదేహం లభ్యమైంది. పోలీసులు గుర్తు తెలియని మహిళగా కేసు నమోదు చేసుకున్నారు.

మహిళ మృతదేహం బయటపడిన విషయం తెలుసుకున్న స్వీటీ తండ్రి సంఘటనా స్థలానికి వచ్చాడు. ఆ మృతదేహాన్ని చూసి బోరుమన్నాడు. అది తమ కుమార్తె మృతదేహమేనని చెప్పాడు. దీంతో పోలీసులు చిక్కు వీడిందని ఊరట చెందారు. అత్తింటి వారు అదనపు కట్నం కోసం వేధించి తమ కుమార్తెను చంపేసి ఉంటారని స్వీటీ తండ్రి ఆవేదన వ్యక్తం చేశాడు. దీంతో పోలీసులు మిస్సింగ్‌ కేసును కాస్త హత్య కేసుగా మార్చి దర్యాప్తు వేగవంతం చేశారు.

మూడు నెలల పాటు విచారణ జరిపిన పోలీసులు.. స్వీటీ ఇద్దరు మరుదులు, వదిన కలిసి ఈ హత్య చేశారని తేల్చారు. మొదట్లో మాకేం తెలియదు మొర్రో అన్నప్పటికీ.. పోలీసుల విచారణ తర్వాత నేరం అంగీకరించారు. పోలీసులు వారి స్టేట్‌మెంట్లు రికార్డు చేసి కోర్టులో ప్రవేశపెట్టారు. అనంతరం జైలుకు తరలించారు.

ఇదిలా ఉండగా.. చనిపోయిందనుకున్న స్వీటీ కొన్ని రోజుల కిందట ముజఫర్‌పూర్‌లో ప్రాణాలతో ఉన్నట్లు తెలిసింది. ఆ విషయం తెలుసుకున్న పోలీసులు షాక్ తిన్నారు. స్వీటీని, ఆమె కుమారుడిని సరణ్‌కు తీసుకొచ్చారు. కేసును రీ-ఓపెన్ చేసి మొదటి నుంచి విచారణ మొదలుపెట్టారు.

ఇంతకీ ఏం జరిగింది?
స్వీటీకి 2008లో పెళ్లి జరిగింది. ఆమె భర్త మన్‌బోధ్‌కు అప్పటికే మానసిక స్థితి సరిగాలేదు. పెళ్లి తర్వాత ఆ సమస్య మరింత తీవ్రమైంది. దీంతో స్వీటీ మనస్తాపానికి గురైంది. అదే సమయంలో ఆమెకు ఓ వ్యక్తి దగ్గరయ్యాడు. భర్తతో వేగలేక స్వీటీ తన కుమారుడిని తీసుకొని అతడితో కలిసి ముంబైకి పారిపోయింది. అసలు విషయం తెలియక ఆమె తల్లిదండ్రులు, పోలీసులు తికమకపడ్డారు.

స్వీటీ వెళ్లిపోయిన రెండు రోజులకే అక్కడికి సమీపంలో మహిళ మృతదేహం లభించడం, అది స్వీటీదేనని ఆమె తండ్రి చెప్పడంతో కేసు మలుపు తిరిగింది. చేయని నేరానికి స్వీటీ అత్తింటి వారు జైలు పాలయ్యారు.

ప్రియుడితో కలిసి ముంబై వెళ్లిపోయిన స్వీటీ కొన్ని రోజుల కిందట ముజఫర్‌పూర్‌కు వచ్చింది. అక్కడి నుంచి పోలీసులు ఆమెను సరణ్‌కు తీసుకొచ్చారు. కొద్ది రోజుల్లో ఆమెను కోర్టులో ప్రవేశపెట్టనున్నట్లు తెలిపారు. ఆమె అత్తింటివారిపై మోపిన అభియోగాలను కొట్టేసి అతి త్వరలో జైలు నుంచి విడుదల చేయనున్నట్లు వెల్లడించారు.

ముంబై వెళ్లిన తర్వాత ఏం జరిగింది అనే విషయం స్వీటీ చెబితే గానీ తెలిసే అవకాశం లేదు. అయితే.. హత్య జరగకపోయినా, తమకు ఏ పాపం తెలియదు మొర్రో అంటున్నా.. స్వీటీ అత్తింటి వారిపై కేసు ఎలా నమోదు చేశారు? ఒకవేళ ఆమె ఆచూకీ దొరక్కపోతే, ఇంకా ఆలస్యమైతే ఏం జరిగి ఉండేది? అనేవి చిక్కు ప్రశ్నలే. అంతేకాదు, మహిళ మృతదేహం లభించగానే స్వీటీదిగా భావించిన వారందరూ.. ఆమె కుమారుడు ఏమయ్యాడనే విషయాన్ని ఎందుకు నిర్లక్ష్యం చేశారనేది మరో ప్రశ్న..!

LEAVE A REPLY

Please enter your comment!
Please enter your name here