పాక్ శాంతిని కోరుకునే దేశం.. ఆర్మీ చీఫ్ బజ్వా చిలకపలుకులు!

0
20



కశ్మీర్ వివాదం సహా భారత్‌తో సంబంధాలపై పాకిస్థాన్ ఆర్మీ చీఫ్ సంచలన వ్యాఖ్యలు చేశారు. పాకిస్థాన్ ఎయిర్‌ఫోర్స్ అకాడమీ క్యాడెట్‌ను ఉద్దేశించి మంగళవారం ఆయన మాట్లాడుతూ.. ఇరు దేశాల మధ్య వివాదాలను శాంతియుతంగా పరిష్కరించుకోడానికి పాక్ సిద్ధంగా ఉందంటూ శాంతివచనాలు వల్లెవేశారు. దశాబ్దాలుగా అపరిష్కృతంగా ఉన్న కశ్మీర్‌ అంశాన్ని హుందాగా, శాంతియుత మార్గంలో పరిష్కరించుకోవాల్సిన అవసరం ఉందని వ్యాఖ్యానించారు.

అంతేకాదు, పాక్ శాంతి కాముక దేశమని, పొరుగువారితో కలిసుండాలని ఆకాంక్షిస్తుందని చిలకపలుకులు పలికారు. అన్ని దిశల్లో శాంతిని పంచాల్సిన సమయం ఆసన్నమైందని పాక్ సైన్యాధిపతి వ్యాఖ్యానించడం గమనార్హం. సాధారణంగా భారత్‌ పట్ల నిరంతరం తన అక్కసు వెళ్లగక్కే జావెద్‌ బజ్వా.. అకస్మాత్తుగా స్వరం మార్చడంపై ఆశ్చర్యం వ్యక్తమవుతోంది.

2019 పుల్వామాలో ఉగ్రదాడికి ప్రతీకారంగా పాకిస్థాన్‌లోని బాలాకోట్‌ ఉగ్రవాద శిబిరంపై భారత్ ఎయిర్ స్ట్రయిక్స్, జమ్మూ కశ్మీర్‌కు ప్రత్యేక హోదా రద్దు తర్వాత ఇరు దేశాల మధ్య సంబంధాలు పూర్తిగా క్షీణించిన సంగతి తెలిసిందే. ఈ నేపథ్యంలో పాక్ సైన్యాధిపతి శాంతి వచనాలు వల్లెవేయడం ప్రాధాన్యత సంతరించుకుంది.

ఆయన వ్యాఖ్యలు మారుతున్న పాక్ వైఖరికి నిదర్శనమని విదేశాంగ నిపుణులు అభిప్రాయపడుతున్నారు. భారత్‌తో సంబంధాల్ని పునరుద్ధరణకు పాక్‌ ఆసక్తి చూపుతున్నట్టు అర్థమవుతోందని అంటున్నారు. వ్యాఖ్యలపై భారత్ ఇంకా స్పందించలేదు. అయితే, బజ్వా వ్యాఖ్యల్ని స్వాగతించడం తొందరపాటు అవుతుందని ఓ సైనికాధికారి వ్యాఖ్యానించారు.

పాక్‌ నిజంగా శాంతినే కోరుకుంటే దాన్ని ఆచరణలో చూపించాలని సూచించారు. ఉగ్రవాదం.. చర్చలు.. సమాంతరంగా ముందుకు సాగవని ఆయన తేల్చి చెప్పారు. పాకిస్థాన్‌లోని ఉగ్రవాద సంస్థలపై అక్కడి ప్రభుత్వం కఠిన చర్యలు తీసుకోవాల్సిందేనని స్పష్టం చేశారు. ఈ వ్యాఖ్యలను యాదృశ్చికంగా చేశారా లేదా మార్పులకు సంకేతమాన అనేది గుర్తించాల్సి ఉందని ఆయన అన్నారు.

పుల్వామా దాడిలో పాక్ ఉగ్రవాదుల పాత్రకు సంబంధించిన కీలక ఆధారాలను భారత్‌ ఇప్పటికే ఇమ్రాన్ ప్రభుత్వానికి అందజేసినా ఎటువంటి చర్యలు తీసుకోలేదు. అంతకు ముందు ముంబయి పేలుళ్ల ఘటనకు కారణమైనవారిపైనా కంటితుడుపు చర్యలకే పరిమితమైంది. కాగా, భారత్‌కు వ్యతిరేకంగా గళాన్ని తగ్గించడానికి మరో కారణం కూడా ఉందని విశ్లేషకులు అభిప్రాయపడుతున్నారు. ప్రధాని ఇమ్రాన్ ఖాన్ ప్రతిపక్ష పార్టీల కూటమి నుంచి తీవ్ర వ్యతిరేకతను ఎదుర్కొంటున్నారు. ఆయన పదవి నుంచి తప్పుకోవాలని డిమాండ్ చేస్తున్నారు. ఈ నేపథ్యంలో పాక్ ఆర్మీ చీఫ్ స్వరంలో మార్పు వచ్చిందని అంటున్నారు.

LEAVE A REPLY

Please enter your comment!
Please enter your name here