‘పవన్‌తో చిరంజీవి కలిస్తే మొత్తం జీరో.. ఆ 2 శాతం కాపులు కూడా ఓటేయరు’

0
18



ఆంధ్రప్రదేశ్‌లో జరిగిన గత అసెంబ్లీ ఎన్నికల్లో ప్రజాశాంతి పార్టీ అధినేత కేఏ పాల్ చేసిన లొల్లి అంతా ఇంతా కాదు. వై.ఎస్.జగన్‌మోహన్ రెడ్డి, చంద్రబాబు, పవన్ కళ్యాణ్‌లకు పోటీగా పాల్ కూడా ప్రచారం నిర్వహించారు. తన పార్టీని గెలిపిస్తే రాష్ట్రాన్ని అభివృద్ధి పథంలో నడిపిస్తానంటూ వాగ్దానాలు చేశారు. తాను అత్యధిక మెజారిటీ గెలిచి రాష్ట్రానికి సీఎం అవతానంటూ బీరాలు పోయారు. చివరికి ఫలితాలు వచ్చేసరికి ఆయన కామెడీ పీస్ అయిపోయారు. అయినప్పటికీ రాష్ట్ర, దేశ రాజకీయాలను పాల్ వదలడం లేదు. వచ్చే ఎన్నికల్లోనూ ఆయన పోటీ చేయనున్నారు.

ఎక్కువగా విదేశాల్లో ఉండే కేఏ పాల్ సోషల్ మీడియా ద్వారా ఎప్పటికప్పుడు రాష్ట్ర రాజకీయాలపై మాట్లాడుతూనే ఉంటారు. అయితే, నెలకొల్పిన జనసేన పార్టీలో చేరబోతున్నారని.. తమ్ముడికి అండగా ఆయన నిలబడబోతున్నారని ఈ మధ్య ఒక ప్రచారం ఊపందుకుంది. పవన్ కళ్యాణ్ వెంట త్వరలోనే చిరంజీవి నడవబోతున్నారని జనసేన పార్టీ రాజకీయ వ్యవహారాల కమిటీ చైర్మన్ నాదెండ్ల మనోహర్ చెప్పడంతో ఈ అంశం చర్చనీయాంశమైంది. మనోహర్ సినిమాలను ఉద్దేశించి అన్నారా? లేదంటే రాజకీయాలను ఉద్దేశించి మాట్లాడారా? అనే విషయంలో స్పష్టత లేనప్పటికీ ఇది కచ్చితంగా రాజకీయాలకు సంబంధించేనని ప్రచారం జరుగుతోంది.

అయితే, ఈ అంశంపై తాజాగా ప్రజాశాంతి పార్టీ అధినేత కేఏ పాల్ స్పందించారు. ఈ మేరకు ఫేస్‌బుక్‌లో వీడియో పోస్ట్ చేశారు. చిరంజీవి వచ్చి పవన్ కళ్యాణ్‌తో కలిసినంత మాత్రాన కాపులు ఓటు వేయరని పాల్ అన్నారు. గత ఎన్నికల్లో జనసేన పార్టీకి వచ్చిన రెండు మూడు శాతం కాపు ఓట్లు కూడా రావన్నారు. దీనికి ఉదాహరణ 2014 ఎన్నికలేనని వెల్లడించారు. ‘58 శాతం ఓటు బ్యాంక్ ఉన్న కాంగ్రెస్‌తో చిరంజీవి కలిస్తే ఒకటి రెండు శాతం కాపులు ఓటేశారు. కాబట్టి, పవన్ కళ్యాణ్‌కు ఉన్న కొంచెం ఇమేజ్ కూడా చిరంజీవి కలిస్తే జీరో అయిపోతుంది. కాంగ్రెస్ జీరో అయిపోయినట్టుగా’ అని కేఏ పాల్ వ్యాఖ్యానించారు.

దేవుడు కొందరికి నటనను బహుమతిగా ఇచ్చాడని.. వాళ్లు నటులుగానే మిగిలిపోవాలని కేఏ పాల్ అభిప్రాయపడ్డారు. రజినీకాంత్ ఏ విధంగా అయితే తాను రాజకీయాల్లోకి రానని అన్నారే మిగిలిన వాళ్లు కూడా అదే నిర్ణయం తీసుకోవాలని అన్నారు. అయితే రాష్ట్రాలను, దేశాన్ని కాపడటానికి, శాంతిని నెలకొల్పడానికి, అప్పుడు తీర్చడానికి, అభివృద్ధి చేయడానికి, నిరుద్యోగ సమస్యను నిర్మూలించడానికి తాను రాజకీయాల్లోకి వచ్చానని కేఏ పాల్ అన్నారు. తన దగ్గర ట్రిలియన్స్ ఆఫ్ డాలర్స్ ఉన్నాయని.. వాటిలో ఒక్క శాతం తీసుకున్నా ఐదేళ్లలో ఒక్క రాష్ట్రానికి 7 లక్షల కోట్లు తాను తీసుకురాగలనని కేఏ పాల్ వ్యాఖ్యానించారు. అందుకే, ఏపీ ప్రజలు తనకు ఓటేయాలని కోరారు.

LEAVE A REPLY

Please enter your comment!
Please enter your name here