తండ్రికి తిండి పెట్టక గదిలో బంధించిన కొడుకు.. కుంగి కృశించి మృతి

0
25



మానవత్వానికే మచ్చ తెచ్చే ఘటన ఇది. కన్నతండ్రిని పున్నామ నరకం నుంచి రక్షించాల్సిన కొడుకు బతికుండగానే నరకం చూపించాడు. 80 ఏళ్ల వృద్ధుడిని గదిలో బంధించి తిండి పెట్టలేదు. రోజుల తరబడి ఆహారం లేకపోవడంతో ఆ పెద్దాయన ఆకలితో అలమటించి, చిక్కి శల్యమై మరణించాడు. వృద్ధుడితో పాటు గదిలో బందీగా ఉన్న ఆయన భార్య ఆస్పత్రిలో ప్రాణాలతో పోరాడుతోంది. కేరళలోని కొట్టాయం జిల్లా మందక్కయం పట్టణంలో ఈ దారుణం చోటు చేసుకుంది.

ముందక్కయమ్ పట్టణానికి చెందిన రెజీ (42) అనే వ్యక్తి తన తల్లిదండ్రులు పోడియన్ (80), అమ్మినీ (76)ను కొన్ని రోజులుగా ఇంట్లోని ఓ గదిలో బంధించాడు. వారికి ఆహారం పెట్టలేదు. ఈ విషయాన్ని ఇరుగుపొరుగు వారు చాలా రోజుల కిందటే గమనించారు. అతడిని నిలదీయగా ఫూటుగా తాగొచ్చి వారిని దూషించేవాడు. అంతేకాకుండా తాను బయటకి వెళ్లాల్సి వచ్చినప్పుడు హాల్‌లో పెంపుడు కుక్కను వదిలిపెట్టేవాడు. రెజీ చేష్టలతో విసిగిపోయి స్థానికులు కుక్క నోట్లో వేలెందుకు పెట్టడమని మిన్నకుండిపోయారు.

రోజులు గడిచేకొద్దీ స్థానికుల్లో ఆందోళన మొదలైంది. తిండి లేక ఆ ముసలోళ్లు ఎక్కడ చనిపోతారేమోనని భయపడి ఆశా వర్కర్లకు, ఓ స్వచ్ఛంద సంస్థ నిర్వాహకులకు సమచారం ఇచ్చారు. పోలీసుల సాయంతో వారు ఆ ఇంటికి చేరుకున్నారు. గదిలో పడి ఉన్న వృద్ధులను చూసి హతాశులయ్యారు. వెంటనే వారిని హాస్పిటల్‌లో చేర్పించారు.

కానీ, వైద్యులు చేసిన ప్రయత్నాలు విఫలమయ్యాయి. రోజుల తరబడి ఆహారం లేక వృద్ధుడి అవయవాలన్నీ దెబ్బతిన్నాయి. ఆస్పత్రిలో చికిత్స పొందుతూ ఆ పెద్దాయన కన్నుమూశాడు. ఆయన పోస్టుమార్టం రిపోర్టు చూసి వైద్యులు నివ్వెరపోయారు. తిండి లేక అవయవాలన్నీ చచ్చుబడిపోయిన తీరు వారిని కంటతడి పెట్టించింది.

రెజీ తన తల్లిదండ్రుల పట్ల ఇంత కర్కశంగా ఎందుకు ప్రవర్తించాడనేది తెలియాల్సి ఉంది. పోలీసులు అతడిపై పలు సెక్షన్ల కింద కేసు నమోదు చేశారు. అతడికి కఠిన శిక్ష పడేలా చర్యలు తీసుకుంటామని తెలిపారు. రెజీ భార్యను కేసులో చేర్చే అంశాన్ని పరిశీలిస్తున్నారు. ఆ తల్లి ఇంకా ఆస్పత్రిలోనే చికిత్స పొందుతోంది. దేవుడా.. ఆమెనైనా బతికించు!!

LEAVE A REPLY

Please enter your comment!
Please enter your name here