జపాన్: ఉద్యోగులకు మూడు రోజులు వీక్లీ ఆఫ్.. బిల్లు తేవాలని నేతలు డిమాండ్

0
27



రెండో ప్రపంచ యుద్ధంలో తీవ్రంగా నష్టపోయిన దేశం జపాన్. ఆ యుద్ధంలో అమెరికా జరిపిన అణుదాడులతో జపాన్ అధిక ప్రాణ, ఆస్తినష్టాన్ని చవిచూసింది. ఈ విషాదం నుంచి కోలుకోడానికి ఇంకో దేశానికైతే కొన్ని వందల సంవత్సరాలు పట్టేది. కానీ, జపాన్ మాత్రం బూడిద నుంచి బతికొచ్చిన ఫినీక్స్ పక్షిలా వచ్చి, ప్రపంచంలోనే మూడో అతిపెద్ద ఆర్ధిక శక్తిగా అవతరించింది. జపాన్ ఆర్ధికంగా అభివృద్ధి సాధించడం వెనకు ఉద్యోగుల కృషి మరువలేనిది. సమయపాలన, కష్టించే పనిచేసే తత్వంతో ముందుసాగి జపాన్‌కు ప్రపంచ పటంలో ప్రత్యేకతను తెచ్చిపెట్టారు. అయితే, ఈ లక్షణమే వారిలో ప్రస్తుతం అభద్రతా భావానికి కారణమవుతోంది.

అక్కడి ఉద్యోగులంతా నిర్దేశిత సమయానికి కార్యాలయానికి వచ్చి పనిలో నిమగ్నమవుతారు. రెండు రోజులు వారాంతపు సెలవులు ఉన్నా యాజమాన్యాన్ని మెప్పించి ఉద్యోగ భద్రత కోసం లేదా వచ్చే అదనపు సంపాదన కోసం ఆఫీసులో ఎక్కువ సమయం గడుపుతారు. సెలవుల్లోనూ ఆఫీసుకు వచ్చి కొన్నిసార్లు అక్కడే నిద్రపోతుంటారు. దీంతో వారు మానసికంగా తీవ్ర సంఘర్షణకు గురవుతున్నారు. కుటుంబానికి సమయం కేటాయించలేకపోతున్నారు. ఈ నేపథ్యంలో ప్రస్తుతం వారానికి మూడు రోజులు సెలవులు ప్రకటించాలని జపాన్ ప్రభుత్వాన్ని అక్కడి రాజకీయ నేతలు కోరుతున్నారు.

ఇప్పటికే అక్కడ ప్రయోగాత్మకంగా అమలు చేసిన ఈ విధానం విజయవంతం కావడంతో దీన్ని శాశ్వతంగా అమలు చేయాలని, చట్టం తీసుకురావడానికి బిల్లు ప్రవేశపెట్టాలని డిమాండ్‌ చేస్తున్నారు. జపాన్ ప్రభుత్వం కొద్ది రోజుల కిందట మూడు రోజుల వారాంతపు సెలవుల విధానాన్ని తీసుకురావాలని యోచించింది. అయితే ఇటీవల కరోనా కారణంగా వర్క్‌ ఫ్రమ్‌ హోమ్‌ విధానం పెరగడంతో ఈ విధానాన్ని మళ్లీ తెరపైకి తీసుకొచ్చారు.

మూడు రోజుల సెలవుల విధానం వల్ల కొవిడ్‌-19 సోకే ముప్పు తక్కువగా ఉంటుందని, ప్రజా రవాణా వినియోగం తగ్గుతుందని అంటున్నారు. అలాగే, తమ కుటుంబాలతో ఉద్యోగులు గడిపేందుకు సమయంతో పాటు ఇతర వృత్తులు చేసుకుంటూ అదనపు ఆదాయం పొందడం లేదా ఉన్నత చదువులు చదువుకునే అవకాశం ఉంటుంది. కానీ, ఈ విధానం అమల్లోకి వస్తే ఉద్యోగుల వేతనాల్లో కోతలు ఉండొచ్చు. వారంలో ఐదురోజులకు బదులు నాలుగు రోజులే పనిచేస్తారు కాబట్టి 20శాతం మేర జీతంలో కోతకు అవకాశం ఉంది.

మూడు రోజులు సెలవులు ఉండటంతో అదనపు సంపాదనకు మరో అవకాశానికి వెసులుబాటు కలుగుతుంది. అయితే, సంస్థలు మాత్రం ఉద్యోగ భద్రత.. ఉద్యోగ ప్రయోజనాలు యథావిధిగా కొనసాగించేలా చూడాలని అంటున్నారు. ఈ బిల్లు తీసుకొస్తే ఉద్యోగులు వారంలో వారిని నచ్చినట్లుగా మూడు రోజులు సెలవులు తీసుకునే వీలు కల్పిస్తుందని నేతలు చెబుతున్నారు. ఉద్యోగుల కోసం పనివేళలు.. కార్యాలయాల్లో పని వాతావారణం నచ్చిన విధంగా మార్చవచ్చని అంటున్నారు.

జపాన్‌లోని మైక్రోసాఫ్ట్‌ సంస్థ 2019 ఆగస్టులో దీనిని ప్రయోగాత్మకంగా అమలు చేసింది. ‘ది వర్క్‌ లైఫ్‌ ఛాయిస్‌ ఛాలెంజ్‌ సమ్మర్‌-2019’ పేరుతో నిర్వహించిన ఈ కార్యక్రమం అద్భుత విజయం సాధించింది. మూడు రోజుల వారాంత సెలవు విధానంలో దాదాపు 40శాతం ఉత్పాదకత పెరిగిందని తేలింది. ఆ దేశంలోని మరో సంస్థ కూడా ఉద్యోగులకు ఈ విధానాన్ని స్వచ్ఛందంగా ఎంచుకునే అవకాశం కల్పించింది. ఈ విధానాన్ని అమలు చేస్తే చిన్న సంస్థలకు చేయూతగా ఆర్థిక ప్రోత్సాహం కల్పించేందుకు కూడా ప్రభుత్వం సిద్ధంగా ఉన్నట్లు తెలుస్తోంది.

LEAVE A REPLY

Please enter your comment!
Please enter your name here