కాంగ్రెస్ ఎంపీ సహా ఆరుగురు జర్నలిస్ట్‌లపై దేశద్రోహం కేసు.. ఎడిటర్స్ గిల్డ్ కీలక వ్యాఖ్యలు

0
23



కాంగ్రెస్ ఎంపీ, సీనియర్ నేత సహా మరో ఆరుగురు జర్నలిస్ట్‌లపై ఉత్తర్ ప్రదేశ్, మధ్యప్రదేశ్ ప్రభుత్వాలు దేశ ద్రోహం కేసులు నమోదు చేశాయి. జనవరి 26న గణతంత్ర దినోత్సవం రోజున వ్యవసాయ చట్టాలకు వ్యతిరేకంగా రైతులు చేపట్టిన కిసాన్ ర్యాలీ హింసాత్మకంగా మారిన సంగతి తెలిసిందే. ఈ నేపథ్యంలో తప్పుడు సమాచారాన్ని పోస్టు చేశారని, దేశ సామరస్యాన్ని దెబ్బతీసేలా వ్యాఖ్యలు చేశారని పేర్కొంటూ వారిపై ఎఫ్ఐఆర్ నమోదు చేశాయి.

నోయిడాలో ఒకటి, మధ్యప్రదేశ్‌లోని భోపాల్, హోషంగాబాద్, ముల్తాయ్, బేతుల్‌లో నాలుగు ఎఫ్ఐఆర్‌లను పోలీసులు నమోదు చేశారు. ప్రముఖ జర్నలిస్ట్ రాజ్‌దీప్ సర్దేశాయ్‌తో పాటు మృణాల్ పాండే, వినోద్ జోష్, జాఫర్ ఆఘా, పరేశ్ నాథ్, అనంత్ నాథ్‌ల పేర్లను ఎఫ్ఐఆర్‌లలో చేర్చారు. ఢిల్లీ పోలీసులు రైతును కాల్చి చంపడం వల్లే రైతులు ఎర్రకోటను ముట్టడించారని పేర్కొంటూ శశిథరూర్ తప్పుడు సమాచారం వ్యాప్తి చేశారని నోయిడాకు చెందిన ఓ వ్యక్తి పోలీసులకు ఫిర్యాదు చేశారు.

అటు, జర్నలిస్టులపై కేసులు నమోదు చేయడాన్ని ఎడిటర్స్ గిల్డ్ తీవ్రంగా తప్పుబట్టింది. వ్యక్తిగత సోషల్ మీడియా ఖాతాల్లో పోస్టులు పెడితే కేసులు ఎలా నమోదు చేస్తారు? అని నిలదీసింది. జర్నలిస్ట్ ఖాతాలను పోలీసులు ప్రత్యేకంగా టార్గెట్ చేశారని మండిపడింది. ఘటనా స్థలంలో సాక్షులు చెప్పిన దాని ప్రకారమే వారు పోస్టులు చేశారని, అది జర్నలిస్టుల లక్షణమని పేర్కొంది.

‘నిరసనకారులలో ఒకరి మరణానికి సంబంధించి వ్యక్తిగత సోషల్ మీడియా ఖాతాలో పోస్టులు పెడితే ప్రత్యేకంగా లక్ష్యంగా చేసుకున్నారు. నిరసన, హింస జరిగిన రోజున పోలీసుల నుంచి ప్రత్యక్ష సాక్షుల వరకు అనేక నివేదికలు వెలువడుతున్నాయని గమనించాలి.. అందువల్ల జర్నలిస్టులు అన్ని వివరాలను బయటపడగానే నివేదించడం సహజం.. ఇది పాత్రికేయ వృతి స్థిర నిబంధనలకు అనుగుణంగా ఉంటుంది’ అని ఎడిటర్స్ గిల్డ్ వ్యాఖ్యానించింది.

రైతులు రెచ్చిపోయి హింసకు పాల్పడితే వారి ఉద్యమం బలహీనపడుతుందని బీజేపీ నేతృత్వంలోని కేంద్ర ప్రభుత్వం భావించిందని ప్రతిపక్షాలు విమర్శలు గుప్పిస్తున్నాయి. జనవరి 26న కేంద్ర ప్రభుత్వ కోరిక తీరిందని, దేశానికి చెడ్డపేరు కూడా వచ్చిందని ఆరోపించాయి. ఇదే విధానాన్ని గతంలో జేఎన్‌యూ వద్ద, సీఏఏకు వ్యతిరేకంగా జామియా మిలియా యూనివర్శిటీ, షాహీన్‌బాగ్‌ల వద్ద జరిగిన ప్రదన్శనల్లోనూ అమలుపరిచారు. హింసకు రైతులను మాత్రమే బాధ్యులను చేయడం సరికాదని వ్యాఖ్యానించారు.

LEAVE A REPLY

Please enter your comment!
Please enter your name here