కరోనా టీకాతో కొత్త ఏడాదిలోకి భారత్?.. శుభవార్త చెప్పిన డీసీజీఐ – india is likely to have a covid-19 vaccine in the new year: dcgi

0
45


కరోనా వైరస్‌కు టీకా కోసం దేశం మొత్తం ఎదురుచూస్తున్న క్షణాలు మరికొద్ది గంటల్లో సాక్షాత్కారం కాబోతున్నాయి. మహమ్మారి నుంచి విముక్తి కలిగించే టీకా శుభవార్తతో కొత్త ఏడాది మొదలు కాబోతుందా? అంటే అవుననే అంటోంది డీసీజీఐ. అతి త్వరలో దేశంలో కోవిడ్‌ టీకా అత్యవసర వినియోగానికి అనుమతులు లభించే అవకాశాలున్నట్లు డ్రగ్‌ కంట్రోలర్‌ జనరల్‌ డాక్టర్‌ వీజీ సోమని సూచనప్రాయంగా వెల్లడించారు. ‘బహుశా.. చేతిలో ఏదో ఒక టీకాతో భారత్‌ నూతన సంవత్సర శుభాకాంక్షలు చెప్పుకుంటుందేమో.. ప్రస్తుతానికి నేను చెప్పగలిగేది ఇంతే’ అని సోమని వ్యాఖ్యానించారు.

ఓ వెబినార్‌లో ఆయన మాట్లాడుతూ… అతి ముఖ్యమైన విషయం ఏమిటంటే, పరిశ్రమ, పరిశోధనా సంస్థలు పరీక్షా సమయంలో నిలిచాయని అన్నారు. టీకా సంస్థలకు నిధులు వచ్చాయని బయోటెక్నాలజీ విభాగం చేసిన ప్రయత్నాల గురించి కూడా ఆయన మాట్లాడారు. మహమ్మారిని దృష్టిలో ఉంచుకొని అన్ని అంశాలను త్వరగా పరిశీలించడం ద్వారా ఆమోదం ప్రక్రియ వేగవంతం చేశాం.. పూర్తి డేటా కోసం వేచి చూడకుండా ఫేజ్ 1, 2 క్లినికల్ ట్రయల్స్ ఫలితాలను పరిగణనలోకి తీసుకుంటాం అని అన్నారు. డేటా భద్రత లేదా సమర్థతపై ఎటువంటి రాజీ లేదని, రెగ్యులేటర్ పాక్షిక డేటాను అంగీకరించింది అని పేర్కొన్నారు.

కాగా, టీకా అత్యవసర వినియోగానికి అనుమతులపై నిపుణుల కమిటీ శుక్రవారం సమావేశం కానుంది. ఈ నేపథ్యంలో సోమని వ్యాఖ్యలకు ప్రాధాన్యత ఏర్పడింది. జనవరి 1 జరగబోయే సమావేశంలోనే టీకాకు అనుమతులు వచ్చే అవకాశాలున్నట్లు తెలుస్తోంది. ఆక్స్‌ఫర్డ్ టీకా కోసం సీరమ్‌ ఇనిస్టిట్యూట్‌, కొవాగ్జిన్ కోసం భారత్‌ బయోటెక్‌, ఫైజర్ సంస్థలు అత్యవసర వినియోగం కోసం దరఖాస్తు చేసిన విషయం తెలిసిందే.

బుధవారం నిపుణుల కమిటీ సమావేశమై ఈ సంస్థల దరఖాస్తులను పరిశీలించింది. వీటిని మరింత లోతుగా పరిశీలించేందుకు శుక్రవారం మరోసారి భేటీ కానుంది. ఈలోగా మరింత సమాచారం అందజేయాలని ఆ సంస్థలను కోరింది. మరోవైపు, కొత్త ఏడాదిలో వ్యాక్సినేషన్‌ కార్యక్రమం చేపట్టనున్నట్లు ప్రధాని మోదీ కూడా వెల్లడించారు. ప్రస్తుతం దేశంలో వ్యాక్సిన్‌ పంపిణీ సన్నాహాలు తుది అంకానికి చేరుకుయన్న మోదీ.. స్వదేశీ టీకాలనే ప్రజలకు అందిస్తామని తెలిపారు. ఈ పరిణామాల నేపథ్యంలో రేపటి భేటీపై సర్వత్రా ఉత్కంఠ నెలకొంది.

LEAVE A REPLY

Please enter your comment!
Please enter your name here