ఆక్స్‌ఫర్డ్ టీకా విస్తృత వినియోగానికి డబ్ల్యూహెచ్ఓ అనుమతి – oxford-astrazeneca vaccine ok to use despite variant questions says who panel

0
27


ప్రధానాంశాలు:

  • ఆక్స్‌ఫర్డ్ కరోనా వైరస్ టీకాకు డబ్ల్యూహెచ్ఓ అనుమతి.
  • వ్యాక్సిన్ ప్రభావంపై దక్షిణాఫ్రికాలో అనుమానాలు.
  • 8 నుంచి 12 వారాల్లోగా రెండు డోస్‌లు తప్పనిసరి.‌

ఆక్స్‌ఫర్డ్-ఆస్ట్రాజెనెకా కోవిడ్-19 వ్యాక్సిన్ వినియోగానికి ప్రపంచ ఆరోగ్య సంస్థ (డబ్ల్యూహెచ్ఓ) బుధవారం గ్రీన్ సిగ్నల్ ఇచ్చింది. ఈ వ్యాక్సిన్ వినియోగంపై దక్షిణాఫ్రికాలో అభ్యంతరం వ్యక్తమవుతోన్న వేళ డబ్ల్యూహెచ్ఓ నిర్ణయం ప్రాధాన్యత సంతరించుకుంది. ఆస్ట్రాజెనెకా రూపొందించిన కరోనా వ్యాక్సిన్ సురక్షితమని, ప్రభావవంతంగా పనిచేస్తుందని, దీనిని విస్తృత స్థాయిలో వినియోగించవచ్చని డబ్ల్యూహెచ్ఓ ప్యానెల్ పేర్కొంది.

డబ్ల్యూహెచ్ఓ స్ట్రాటజిక్ అడ్వైజరీ గ్రూప్ ఆఫ్ ఎక్స్‌పర్ట్స్ ఆన్ ఇమ్యునైజేషన్ (సేగ్) ప్రకారం రెండు డోస్‌ల టీకా తప్పనిసరని, 8 నుంచి 12 వారాల మధ్య ఈ రెండింటిని తీసుకోవాలని సూచించింది. అంతేకాదు, 65 ఏళ్లు, ఆపై వయసు వారికి కూడా ఈ టీకా సురక్షితమని తెలిపింది. సెగ్ ప్రతినిధి అలెజాండ్రో క్రవియోటో మాట్లాడుతూ.. కోవిడ్-19కు ఆస్ట్రాజెనెకా ప్రభావంపై దక్షిణాఫ్రికా తదితర దేశాల్లో అభ్యంతరాలు వ్యక్తం అవుతున్నాయని, అయితే అక్కడ ఈ వ్యాక్సిన్ వినియోగాన్ని నిలిపివేయడం తగదని వ్యాఖ్యానించారు.

‘అక్కడ కరోనా వైరస్ కొత్త వేరియంట్ బయపడింది..ఫలితంగా వ్యాక్సిన్ ప్రభావం తక్కువగా ఉంది.. ఇంతకు మించి ఆయా దేశాలలో వ్యాక్సిన్ వినియోగం నిలిపివేయడానికి ప్రత్యేక కారణాలేవీ కనిపించడం లేదు’ అని అన్నారు. ‘ఈ వ్యాక్సిన్ సామర్థ్యం ముఖ్యంగా వైరస్ తీవ్రతకు వ్యతిరేకంగా పూర్తి ప్రభావాన్ని చూపే అవకాశం తక్కువగా ఉన్నా కొత్త వేరియంట్ వ్యాప్తి ఉన్న దేశాలలో కూడా దీని వాడకానికి సిఫార్సు చేశాం’అని అలెజాండ్రో పేర్కొన్నారు.

మరోవైపు, ఆక్స్‌ఫర్డ్ టీకా వినియోగానికి కెనడా ఆరోగ్య విభాగం సిఫార్సు చేసింది. ఆ సంస్థ సమర్పించిన ఫలితాల నివేదికను సమీక్షించి, ఈ నిర్ణయం తీసుకుంది. మోడెర్నా, ఫైజర్ వంటి వ్యాక్సిన్లతో పోల్చితే ఆస్ట్రాజెనెకాను భద్రపరచడం అత్యంత సులభం. ఈ టీకా 70 శాతంపైగా ప్రభావం చూపినట్టు క్లినియల్ ట్రయల్స్‌లో వెల్లడయ్యింది.

LEAVE A REPLY

Please enter your comment!
Please enter your name here